Pesë asamblistë të Lidhjes Demokratike të Kosovës në Ferizaj i janë bashkuar ish-anëtares së kësaj partie, Vjosa Osmanit, e cila do të garojë me një iniciativë qytetare në zgjedhjet e ardhshme nacionale.
Hysnije Shamolli-Mustafa, Hesat Shatrolli, Balton Dërguti, Ekrem Mustafa dhe Burim Karameta janë emrat e larguar nga kjo parti.
“Realisht, nuk ka qenë dëshirë e as synim i asnjërit nga ne që të kalojmë nga LDK, por meqë Dega në Ferizaj ishte përçarë aq keq pas humbjes ne zgjedhje lokale e edhe më keq pas humbjes ne zgjedhjet e fundit qendrore ku na fitoi vetëm nje kandidate, ne morëm nje iniciativë për të bashkuar Degën”, ka thënë Shamolli për Klan Kosovën.
“Mirëpo, nga kryetari dhe disa të tjerë, ne u paraqitëm si përçarës, u injoruam totalisht, dhe siç ishin mësuar tashmë një ekip aty, vazhduan me kapjen e Degës duke vendosur pesë nënkryetarë (thua ti se jemi qendra) pa u konsultuar fare me ne ani pse na kishin premtuar që kryesinë do ta ftojnë pikërisht për të gjetur formën e unifikimit”.
Njëra prej të larguarve, Shamolli Mustafa, ka thënë për Klan Kosovën që pas përçarjeve që kishin filluar me humbjen e tyre në zgjedhjet e fundit lokale, ata ishin munduar ta zgjidhin këtë situatë por sipas saj ishin injoruar nga kryetari i degës së LDK-së në Ferizaj, Muharrem Svarqa.
Kështu, ajo ka pohuar se kanë vendosur që t’i bashkohen Osmanit për të cilën tha se është e vetmja që nuk ka ikur nga premtimet që ua ka dhënë qytetarëve.
“U munduam ta takojmë edhe kryetarin e partisë për te gjetur një zgjidhje, por as ai nuk e pa te arsyeshme përpjekjen për unifikim te degës. Ne shterëm te gjitha mundësitë për bashkim dhe për të mos shkelur tutje parimet tona dhe për të qëndruar besnik ndaj premtimeve që LDK i kishte dhënë para zgjedhjeve, vendosem te takohemi me njeriun e vetëm që nuk ka dalë nga premtimet që ju dha qytetarëve, dhe kjo eshte Vjosa Osmani.
