Albert Krasniqi nga Demokracia Plus, ka thënë se raundi i parë i votimit për President të Kosovës është i pakaluar nëse në votim nuk marrim pjesë mbi 80 deputetë.
“Nuk është konsumuar raundi i parë. Prania fizike është vetëm për të nisur procesi i votimit. Duhet të jenë 80 fletëvotime të pakën në kutinë e votimit, nëse nuk janë raundi i parë duhet të përsëritet edhe një herë”, është shprehur Krasniqi, njofton Klan Kosova.
“Duhen 80 vota në kuti, përndryshe për raundin e parë mund të votohet pafundësisht”.
Krasniqi është shprehur se nga kjo situatë mund të dilet më 5 maj, kur është afati i fundit për zgjedhjen e presidentit të ri.
“Në momentin kur janë deponuar dy kandidatura, aty kanë filluar rrjedhja e afatave për zgjedhjen e presidentit dhe brenda 60 ditëve nëse nuk zgjedhet presidenti, Kuvendi shpërndahet me automatizëm. Në këtë rast nuk vlen 60 ditshi sepse kemi ushtrues detyre të presidentit deri më 5 maj, atëherë Kuvendi shpërndahet në këtë afat dhe shkohet në zgjedhje”./GazetaBlic
