Hasan Bitmez, deputet opozitar në Turqi, vdiq të enjten, dy ditë pasi kishte pësuar sulm në zemër e pasi kishte rënë në tokë në sallën e Kuvendit, përderisa po përfundonte një fjalim me kritika ndaj politikave qeveritare ndaj Izraelit.
Deputeti Bitmez ishte pjesë e partisë opozitare “Saadet”. Ai vdiq në një spital në kryeqytetin Ankara, tha para gazetarëve ministri i Shëndetësisë i Turqisë, Fahrettin Koca.
Bitmezi ishte i martuar dhe baba i një fëmije. Gjatë transmetimit të seancës para dy ditëve, ai ishte parë duke rënë në dysheme, pasi kishte qëndruar në foltore, raporton agjencia “Reuters”.
Deputeti ishte duke e kritikuar partinë e presidentit Rexhep Erdogan për tregtinë e vazhdueshme me Izraelin pavarësisht nga lufta në Gaza e pavarësisht nga kritikat e ashpra retorike të Qeverisë ndaj bombardimit të Gazës nga Izraeli.