Situata nga Covid-19/ Nga 30 shtatori, Japonia i jep fund gjendjes së jashtëzakonshme

Qeveria japoneze ka njoftuar se me 30 shtator do t’i jepet fund gjendjes së jashtëzakonshme e cila është shpallur për shkak të situatës nga koronavirusi.

Përmes një konference për shtyp, kryeministri japonez, Yoshihide Suga, ka thënë se edhe kufizimet anti-COVID do të hiqen gradualisht në mënyrë që të rikthehen aktivitetet e përditshmërisë, pavarësisht prezencës së virusit.

Suga ka thënë se qeveria do të krijojë më shumë qendra të përkohshme vaksinimi në mënyrë që procesi të vazhdojë. Ndërkohë që autoritetet po punojnë edhe për pasaportat e vaksinimit.

Gjendja e jashtëzakonshme në Japoni është shpallur që në muajin prill.