Parlamenti turk votoi me shumicë të madhe për hyrjen e Suedisë në NATO. Tani presidenti Erdogan duhet të nënshkruajë edhe protokollin e anëtarësimit.
Lament miratoi pranimin e Suedisë në NATO. Mbrëmjen e djeshme (23.01) në Ankara 287 deputetë votuan “pro”, 55 ishin “kundër”, dhe 4 deputetë abstenuan. Tani presidenti Rexhep Tajip Erdogan duhet ende të nënshkruajë të ashtuquajturin protokoll pranimi, i cili konsiderohet pothuajse i sigurt. Pas nënshkrimit të Erdoganit, vendimi do të publikohet në fletoren zyrtare.
Dhe Hungaria, anëtare e NATO-s, duhet të pranojë zyrtarisht pranimin e Suedisë. Të gjithë 29 aleatët e tjerë tashmë e kanë bërë këtë.
Suedia dhe qeveria gjermane e mirëpresin këtë veprim
Kryeministri suedez Ulf Kristofferson njoftoi në Platformën X se vendi i tij tani është një hap më afër anëtarësimit në NATO. Qeveria gjermane tha se e mirëpret vendimin e parlamentit turk. “Ky është një vendim i rëndësishëm dhe korrekt”, u njoftua në Berlin. Pranimi i ardhshëm do të forcojë më tej NATO-n në tërësi, thotë qeveria, e cila supozon se procesi i pranimit tani mund të përfundojë shpejt.
Erdogan e ka kushtëzuar marrëveshjen e tij
Pas fillimit të pushtimit rus të Ukrainës, Suedia aplikoi për anëtarësim në NATO së bashku me Finlandën në maj 2022. Finlanda u pranua në aleancë si anëtarja e 31-të në fillim të prillit të vitit të kaluar. Erdogan e lidhi miratimin e vendit të tij, ndër të tjera, me dërgesat e avionëve luftarakë nga Shtetet e Bashkuara. Megjithatë, deri më tani, ende nuk ka miratim për të nga Kongresi amerikan. Turqia gjithashtu e ka justifikuar vazhdimisht bllokadën e saj me atë që i sheh si përpjekje të pamjaftueshme të Suedisë kundër “organizatave terroriste”. Ankaraja është kryesisht e shqetësuar për PKK-në e jashtëligjshme dhe milicinë kurde siriane YPG. Qeveria në Stokholm i është përgjigjur kërkesave të Turqisë me ligje më të ashpra kundër terrorizmit.
