Partia e kryeministrit Avdullah Hoti, LDK-ja ka tash e disa javë që është duke u përpjekur të organizoj një tryezë të partive politike për të zgjidhur ‘lëmshin’ e krijuar me postin e presidentit.
Posti i presidentit është duke u mbajtur nga u. d. e presidentes Vjosa Osmani që nga 5 nëntori, datë në të cilën ish-presidenti Hashim Thaçi dhe dorëheqje pas konfirmimit të aktakuzës nga Gjykata Speciale.
Për më shumë se një muaj, partitë politike në Kosovë kanë dhënë versionet e tyre mënyrën më të mirë sesi duhet të zgjidhet ky lëmsh, por deri më tani këto versione nuk kanë prodhuar asnjë takim e as marrëveshje të koalicionit qeveritar.
E në anën tjetër njohësit e çështjeve politike në vend vlerësojnë se një tryezë e partive politike nuk mund të prodhoj ndonjë marrëveshje gjithëpërfshirëse për çështjen e presidentit.
Deri më tani nga Lëvizja Vetëvendosje janë shprehur se duan zgjedhje të reja pastaj diskutime për presidentin, PDK-ja ka insistuar që votat e saj shkojnë vetëm për një kandidat të tyre, LDK ka theksuar se kjo pozitë i takon PDK-së, ndërsa AAK-ja ka shpallur kandidaturën ish-kryeministrit Ramush Haradinaj për këtë pozitë.
Gazetari Enver Robelli në një prononcim për KALLXO.com ka vlerësuar se pozita e presidentit vazhdon të jetë e lidhur ngushtë me fatin e qeverisë Hoti dhe përfshirjen e PDK-së ose jo në këtë qeveri.
“PDK-ja po pret epilogun e betejës mes LDK-së dhe AAK-së për të vendosur pastaj nëse dëshiron të marrë postin e presidentit dhe si kundërshpërlbim të mbajë në pushtet qeverinë e Avdullah Hotit. Kjo lojë cinike me postin e presidentit (jo për herë të parë) është dëmsjellëse për shumë arsye”, ka thënë ai.
Për Robellin, skenari i shkuarjes në zgjedhje të parakohshme nuk do të ishte diçka e papritur.
“Jemi ende në fazën e matjes së forcave dhe shantazheve të ndërsjella mes partive të pushtetit. Por dështimi i zgjedhjes së presidentit dhe shkuarja në zgjedhje parlamentare nuk do të ishte kurrfarë tragjedie”, ka thënë ai.
Duke përmendur polarizimin e partive politike në Kosovë, gazetari Robelli ka vlerësuar se më e pranueshme do të ishte një tryezë për zgjedhje në vend sesa zgjedhje të presidentit.
“Ndoshta duhet të organizohet një tryezë për dakordimin e partive për zgjedhje të reja parlamentare. Sa i përket tryezës për kryetarin: gjasat po duken të vogla. Polarizimi mes partive është aq i madh, saqë nuk ka shumë besim mes tyre. Kryetari i LDK-së bëri përpjekje për një takim me krerët e partive dhe askush nuk e mori seriozisht. Gjasat janë të mëdha që edhe LDK do të bojkotonte një tryezë të VV-së për zgjedhje të reja parlamentare”, ka thënë ai.
Në prononcimin e tij për KALLXO.com gazetari Robelli ka theksuar se politika në Kosovë është e bazuar në dy skena.
“Në 12 muajt e fundit secila palë e ka dhënë kontributin e vet për deformimin e mëtutjeshëm të besimit. Politika në Kosovë në fakt prej vitesh i ka dy skena: një publike dhe një të padukshme, ku arrihen marrëveshjet e fshehta (rasti i fundit: sigurimi i votës për zgjedhjen e qeverisë në orët e vona të natës). Kush bën politikë me këso metodash të territ, e ka vështirë të sjellë dritë”, ka theksuar ai.
Dje kryeministri Avdullah Hoti ka thënë se janë duke u munduar që sa më shpejtë të organizojnë një tryezë të partive politike.
Shkrimin e plotë mund ta lexoni në kallxo.com:
