Shqiptohen gjoba edhe për çiklistët dhe këmbësorët e papërgjegjshëm, vetëm dje janë shqiptuar 814 gjoba

Në kuadër të kontrolleve të shtuara të trafikut që po i realizon Ministria e Punëve të Brendshme në të gjithë territorin e shtetit, gjatë ditës së djeshme, shërbimet policore kanë shqiptuar gjithsej 814 gjoba. Shumica e shkeljeve lidhen me parkimin e parregullt dhe mosrespektimin e shpejtësisë së lejuar, por një numër i konsiderueshëm gjobash janë shqiptuar edhe ndaj këmbësorëve dhe çiklistëve, thuhet në njoftimin e Ministrisë së Punëve të Brendshme (MPB). Sipas të dhënave të MPB-së, 27 këmbësorë janë ndëshkuar për shkelje të ndryshme, ndërsa tetë çiklistë janë gjobitur për mosrespektim të rregullave të trafikut. Këto shifra theksojnë rëndësinë e kujdesit dhe përgjegjësisë së të gjithë pjesëmarrësve në trafik, jo vetëm të drejtuesve të mjeteve motorike. Kontrollet po ashtu treguan se një pjesë e shkeljeve lidhen me kalimin e dritës së kuqe, ku janë regjistruar 16 raste të tilla, si dhe tetë drejtues mjetesh që kanë drejtuar automjetin nën ndikimin e alkoolit. Gjithashtu, 15 automjete janë kapur të paregjistruara, ndërsa pesë janë konstatuar si teknikisht të pasigurta për qarkullim. Shërbimet policore paralajmërojnë se kontrollet e shtuara do të vazhdojnë edhe në periudhën e ardhshme, me qëllim përmirësimin e sigurisë rrugore. Ata apelojnë tek të gjithë pjesëmarrësit – drejtuesit e mjeteve, çiklistët dhe këmbësorët – që të respektojnë rregullat dhe ligjet e trafikut, për të reduktuar rrezikun e aksidenteve dhe për të rritur sigurinë e përgjithshme në rrugë.