Ka ndërruar jetë Kushtrim Hajdaraj, djali i Tomë Hajdarajt, ish-deputetit dhe ministrit të Kosovës.
Për vdekjen e tij e ka folur edhe Don Lush Gjergji.
“Sot, më 12 mars 2024, rishtas jemi këtu për varrimin e birit të Tomës dhe Pashkës, vëllait tonë të ri, Kushtrimit tonë të dashur dhe të paharrueshëm. Ai ishte si rrezet e Diellit, që ei largojnë mjegullat, vranësimin, shiun, dhe na japin ngrohtësi, dritë, shpresë, disponim, lumturi”, ka thënë Don Lush Gjergji, i cili ka kujtuar se më 21 qershor 2016 kishte ndërruar jetë edhe babai i Kushtrimit, Tomë Hajdaraj, ish-deputet dhe ministër i Republikës së Kosovës.
Njoftimi i plotë i Don Lush Gjergji:
In memoriam: Kushtrim (Tomë) HAJDARAJ (1987 – 2024)
Shijoje rininë e amshuar që nuk përfundon kurrë!
E dashura familje e të ndjerit Kushtrim, të dashur besimtarë, vëllezër dhe motra, sot të pikëlluar, por një ditë të ngushëlluar,
Para tetë viteve, pikërisht më 21 qershor 2016, ishim këtu për varrimin e mikut, shokut, vëllait dhe bashkëpunëtorit tejet të vyeshëm dhe shumë të dashur, Tomë Hajdarit.
Sot, më 12 mars 2024, rishtas jemi këtu për varrimin e birit të Tomës dhe Pashkës, vëllait tonë të ri, Kushtrimit tonë të dashur dhe të paharrueshëm. Ai ishte si rrezet e Diellit, që ei largojnë mjegullat, vranësimin, shiun, dhe na japin ngrohtësi, dritë, shpresë, disponim, lumturi…
Dikush ndoshta thotë: zgjati tepër pak! Po, por mos të harrojmë se jeta tokësore është mbjellje për amshim. Kur mbjellja ujitet me lot, pa dyshim jep shumë fryte.
Nga ngjarjet e tilla mendja errësohet dhe shtron pyetje: Pse dhe si ndodhi kjo? Zemra shqetësohet dhe tronditet, njeriu është në rrezik ta humbë drejtpeshimin.
Kemi shumë pse-he, pa ndonjë përgjigje të arsyeshme, por përgjigjja e vetme është feja, Zoti, sepse prej Tij rrjedhim, me Te jetojmë dhe te Ai kthehemi, prandaj e tërë jeta jonë, e kaluara, e tashmja, sidomos e ardhmja, amshimi, nuk është në duar tona, por të Zotit, të Provanisë dhe dashurisë së tij.
Jeta e njeriut nuk matet me kohë apo me vite, dekada, por me cilësi dhe thellësi, me kualitet. Mozarti i famshëm ka jetuar pak, por ka dhuruar shumë mbarë njerëzimit me muzikën e tij të mrekullueshme. Një natë para se të vdiste ai i kishte shkruar këto fjalë dhe këtë testament: “Të falënderoj o Zot, që ma ke dhënë fenë e cila me siguron që do të jetoj në amshim, pra, kjo jetë ka fillim, por nuk ka mbarim, por vetëm kalim në amshim!”.
Kushtrimi ynë nuk e di a ka lënë ndonjë testament të shkruar me dorë, por atë e ka lënë dhe dhënë me jetë, me dëshmi, me buzëqeshje dhe gëzim, me bashkëshorten dhe dy fëmijë – lule jete dhe dashurie, kujtim dhe vazhdimësi e jetës dhe familjes së tij…
