Ahmeti: Për sundimin e ligjit dhe besimin e qytetarëve te institucionet, vetingu është i domosdoshëm

Nevojitet veting që partitë politike të mos shndërrohen në prokurorë apo gjyqtarë, deklaroi kryetari i Bashkimit Demokratik për Integrim (BDI), Ali Ahmeti.
Në një takim me anëtarët dhe simpatizantët e Bashkimit Demokratik për Integrim (BDI) në Manastir, lideri Ali Ahmeti theksoi se është e nevojshme të bëhet një hetim mbi procesin e privatizimit dhe prejardhjen e pasurisë së të gjithë politikanëve dhe funksionarëve në vend.
“Për të pasur sundim të ligjit dhe për të rikthyer besimin e qytetarëve tek institucionet, është e domosdoshme të kemi veting. Për të parandaluar që partitë politike të shndërrohen në prokurorë ose gjyqtarë, nevojitet veting brenda partive politike, për liderët e partive dhe për të gjithë funksionarët,” tha Ahmeti.
Ai gjithashtu theksoi se duhet të bëhet një hetim i plotë për procesin e privatizimit dhe për prejardhjen e pasurisë së politikanëve dhe funksionarëve.
Në një deklaratë për mediat, lideri i BDI-së pohoi se anëtarësimi i vendit në Bashkimin Evropian është alternativa e vetme.
“Po diskutojmë me qytetarët për nevojën e anëtarësimit të vendit në Bashkimin Evropian si alternativën e vetme. Është mirë që kemi një pjesëmarrje të madhe në këto takime dhe jemi të kënaqur me pjesëmarrjen e qytetarëve, për t’u shpjeguar atyre forcimin e marrëdhënieve ndër-etnike në vendin tonë, si një nga çështjet kyçe për paqen, stabilitetin dhe demokracinë funksionale. Po bisedojmë me popullin sepse vendi ynë ka nevojë për sundim të ligjit,” theksoi Ahmeti gjatë vizitës së tij të sotme në Manastir.