Tre gjyqtarë nga Këshilli Gjyqësor do të hetojnë nëse gjyqtarja Aleksovska-Stojanovska ka bërë ndonjë lëshim në çështjen kundër Vasil Jovanovit

Gjyqtarët Danka Ristova, Antoaneta Dimovska dhe Tatjana Çaçarova Ilievska janë tre anëtarët e Komisionit të formuar nga Këshilli Gjyqësor, i cili, brenda kompetencave të tij, duhet të hetojë nëse ka pasur lëshime në vendimin e gjyqtares Daniela Aleksovska-Stojanovska nga Gjykata Themelore Penale Shkup. Ajo kishte shqiptuar masën edukative-korrektuese – dërgim në qendër korrektuese për të mitur – për Vasil Jovanovin, për shkak të posedimit dhe shitjes së lëndëve narkotike.
Kryetari i Këshillit Gjyqësor, Aleksandar Kambovski, deklaroi sot se Komisioni duhet të veprojë me kujdes.
– Komisioni duhet të veprojë me kujdes, në mënyrë që të mos krijojë presion mbi gjykatat e apelit, sepse ato duhet të vendosin në mënyrë të pavarur mbi këtë vendim të shkallës së parë. Nëse është i drejtë, do ta konfirmojnë. Nëse vlerësojnë se nuk është në rregull dhe se ka pasur shkelje të caktuara të procedurës, do ta anulojnë ose ndoshta do ta ndryshojnë. Prandaj, Komisioni duhet të kryejë vëzhgimin me kujdes dhe pasi ta përfundojë atë, do të hartojë raportin e tij. Procesi do të zhvillohet paralelisht. Megjithatë, duhet të jemi të kujdesshëm, sepse nuk duam që Gjykata e Apelit të ndjejë ndonjë presion nga ana jonë. Mjafton presioni që tashmë vjen nga publiku ndaj kësaj gjykate, tha Kambovski pas mbledhjes së Këshillit Gjyqësor.
Vendimi për këtë vepër penale ndaj Jovanovit ende nuk është i formës së prerë, pasi Gjykata e Apelit ende nuk është shprehur mbi ankesën.
Vasil Jovanov është i riu që përplasi për vdekje Frosina Kulakovën në bulevardin “Partizanski Odredi” në Shkup dhe akuzohet se e ka kryer veprën me dashje, pasi drejtonte automjetin pa patentë shoferi, kaloi me të kuqe dhe ishte nën ndikimin e alkoolit.