Eurozona shmangu papritur rrëshqitjen në recesion, pavarësisht nga tkurrja e ekonomisë gjermane dhe stanjacioni në Francë në tremujorin e fundit të vitit të kaluar, tha Eurostat të martën.
PBB-ja e Eurozonës ngeci në tremujorin e katërt, më mirë se rënia prej 0.1 përqind që kishin parashikuar analistët pasi ekonomitë evropiane u përballën me norma të larta interesi dhe dobësim të kërkesës së huaj, sipas të dhënave paraprake nga agjencia evropiane e statistikave.
Eurozona shmangu recesionin falë rritjes më të fortë në Itali (0.2 përqind), Belgjikë dhe Letoni (0.4 përqind), Spanjë (0.6 përqind) dhe Portugali (0.8 përqind), duke kompensuar humbjet në Gjermani (-0.3 përqind). Rënia më e madhe e PBB-së prej -0.7 për qind u regjistrua në Irlandë.
Banka Qendrore Evropiane ka rritur normat e interesit në një rekord të lartë gjatë një viti e gjysmë të kaluar, duke krijuar kushte më të shtrënguara financiare në të gjithë eurozonën që kanë ndihmuar në uljen e inflacionit nga kulmi prej 10.6 përqind në tetor 2022 në 2.9 përqind dhjetorin e kaluar.
Në bazë vjetore, PBB-ja e rregulluar sezonalisht u rrit me 0.1 për qind në zonën e euros dhe 0.2 për qind në BE në tërësi. Të enjten do të publikohen të dhënat më të fundit të inflacionit në Eurozonë.
