Zyrtarët amerikanë të shëndetësisë po paralajmërojnë mjekët që të jenë në vëzhgim për rastet e mundshme të helmimit nga plumbi tek fëmijët e vegjël në të gjithë vendin. Paralajmërimi vjen pasi të paktën 22 fëmijë të vegjël në 14 shtete shfaqën simptoma të helmimit nga plumbi.
Helmimi besohet të jetë shkaktuar nga paketimi i salcës së mollës dhe kompostos së mollës të kontaminuar me plumb. Fëmijët ndërmjet moshës 1 dhe 3 vjeç u prekën, dhe të paktën një prej tyre kishte një nivel të plumbit në gjak tetë herë më të lartë se niveli që përgjithësisht konsiderohet të jetë shqetësues, tha Qendra për Kontrollin dhe Parandalimin e Sëmundjeve.
Niveli i plumbit në gjakun e fëmijëve të prekur varionte nga katër deri në 29 mikrogramë për decilitër.
Simptomat e raportuara përfshijnë dhimbje koke, nauze, të vjella, diarre, ndryshim në nivelin e aktivitetit dhe anemi.
Paketat e salcës së mollës WanaBana për fëmijë nga Schnucks dhe Weis tashmë janë tërhequr. Produktet shiten në dyqane dhe në internet.
Që nga 7 nëntori, ka pasur raste të helmimit nga plumbi tek fëmijët e vegjël në shtetet e Alabama, Arkansas, Luiziana, Maryland, Missouri, New Mexico, New York, North Carolina, Ohio, Pennsylvania, South Carolina, Tennessee, Texas dhe Washington. .
