Një ish-oficer i CIA-s është dënuar me 40 vjet burg për rrjedhje informacioni në WikiLeaks.
Ai u dënua për akuza të shumta: spiunazh, hakerim kompjuterik, përbuzje të gjykatës, dhënie të deklaratave të rreme në FBI dhe posedim të imazheve të abuzimit seksual të fëmijëve.
Joshua Schulte e tradhtoi vendin e tij duke kryer disa nga krimet më të urryera të spiunazhit në historinë amerikane, tha prokurori i përgjithshëm. Schulte i mohoi të gjitha akuzat.
Prokurorët e akuzuan atë për zbulimin e mjeteve të CIA-s “Vault 7”, të cilat lejojnë oficerët e inteligjencës të hakojnë telefonat inteligjentë dhe t’i përdorin ato si pajisje përgjimi.
Schulte, 35 vjeç, i dha WikiLeaks 8,761 dokumente në vitin 2017, shkelja më e madhe e të dhënave në historinë e CIA-s, tha Departamenti Amerikan i Drejtësisë.
Sipas CNN, Schulte ishte i punësuar si programues në Qendrën e Inteligjencës Kibernetike, e cila spiunon organizatat terroriste dhe qeveritë e huaja.
Prokurorët thanë në gjyq se në vitin 2016 ai vodhi informacionin dhe ia dha WikiLeaks-it, më pas gënjeu agjentët e FBI-së për rolin e tij.
Ata thanë se ai ishte i motivuar nga zemërimi për një mosmarrëveshje në vendin e punës dhe donte të ndëshkonte ata që mendonte se i kishin bërë keq. Ai ndodhet në burg që nga viti 2018.
