Pacientët e parë në Mbretërinë e Bashkuar kanë marrë një terapi eksperimentale të kancerit të bazuar në inxhinierinë inovative të acidit ribonukleik (ARN).
Një provë klinike në Britaninë e Madhe e një trajtimi të ri të quajtur terapi mRNA do të ekzaminojë efektivitetin e kësaj qasjeje mjekësore në luftën kundër formave të shumta të kancerit, shkruan e përditshmja londineze Guardian.
Kjo terapi eksperimentale deri më tani është përdorur vetëm tek pacientët në një spital në Londrën perëndimore. Qëllimi i hulumtimit klinik është të përcaktojë sigurinë dhe efektivitetin e terapisë në trajtimin e melanomës, kancerit të mushkërive dhe formave të tjera të të ashtuquajturave tumore solide.
Trajtimi i ri përdor material gjenetik të njohur si mRNA që funksionon duke njohur shënuesit e zakonshëm të tumorit në sistemin imunitar të pacientit.
Qëllimi i trajtimit është identifikimi dhe luftimi i qelizave kancerogjene që lëshojnë këta shënues. “Imunoterapitë e reja të kancerit të bazuara në mRNA ofrojnë një mënyrë për të aktivizuar sistemin imunitar të pacientit për të luftuar kancerin,” shpjegoi drejtuesi i projektit Dr. David Pinato nga King’s College në Londër.
Pinato thotë se ky hulumtim është ende në fazat e hershme dhe mund të kalojnë vite përpara se trajtimi të bëhet i përhapur
Megjithatë, testi i ri ka hedhur themelet për zhvillimin dhe futjen e terapive të reja më pak toksike dhe më të sakta të kancerit. “Kjo është e nevojshme në mënyrë që të mund të ndryshojmë rrjedhën e kancerit,” shtoi Pinato.
Që atëherë, një numër i vaksinave të reja kundër kancerit kanë hyrë në provat klinike në mbarë botën.
