Hamasi njoftoi ofertën për një armëpushim katër-mujor e gjysmë në Gaza dhe përfundimin e luftës, në përgjigje të një propozimi të bërë javën e kaluar nga ndërmjetësuesit e Katarit dhe Egjiptit të mbështetur nga SHBA dhe Izraeli. Sipas një draft dokumenti të parë nga Reuters, kundëroferta e Hamasit kërkon tre faza, secila prej 45 ditësh.
Propozimi i grupit islamik sunit përfshin shkëmbimin e pengjeve izraelite të rrëmbyer më 7 tetor me palestinezët në burgjet izraelite. Aty përmendet edhe rindërtimi i Gazës, i cili duhet të fillojë menjëherë, tërheqja e plotë e forcave izraelite dhe shkëmbimi i trupave dhe mbetjeve.
Sekretari amerikan i Shtetit Anthony Blinken mbërriti në Izrael mbrëmë pas takimit me ndërmjetësit e Katarit dhe Egjiptit në negociatat midis Izraelit dhe Hamasit në përpjekjen më serioze diplomatike për të vendosur një armëpushim të zgjatur. Detajet e kundërofertës së Hamasit nuk u zbuluan më parë.
Sipas kundërpropozimit të Hamasit, të gjithë pengjet izraelitë, të rinjtë nën 19 vjeç, të moshuarit dhe të sëmurët do të shkëmbeheshin brenda 45 ditëve të para për gratë dhe të miturit palestinezë në burgjet izraelite. Pengët e mbetur meshkuj do të lirohen në fazën e dytë, ndërsa eshtrat e pengjeve të vrarë do të shkëmbehen në fazën e tretë. Deri në fund të fazës së tretë, Hamasi pret që të dyja palët të përfundojnë një marrëveshje për t’i dhënë fund luftës.
Grupi militant që sundon Gazën deklaron në mbështetje të propozimit se kërkon lirimin e 1500 të burgosurve, një e treta e të cilëve do të zgjidhen nga një listë e palestinezëve të dënuar me burgim të përjetshëm.
Armëpushimi duhet të lejojë gjithashtu një rritje në dërgimin e ushqimeve dhe ndihmave të tjera në Gaza.
Izraeli filloi një ofensivë ushtarake në Gaza pasi Hamasi masakroi civilët izraelitë më 7 tetor, rreth 1200 prej tyre, dhe rrëmbeu 253 njerëz, gra, fëmijë, foshnja, burra dhe të moshuar. Sipas Hamasit, 27,585 njerëz vdiqën në ofensivën izraelite. Hamasi nuk specifikon se cili numër i referohet luftëtarëve të tij dhe anëtarëve të fraksioneve të tjera islamike dhe cili civilëve.
